شادی ہالوں کے لیے نئی کورونا ایس او پیز جاری

نیشنل کمانڈ اینڈ آپریشن سینٹر (این سی او سی) نے کورونا کا پھیلاؤ روکنے شادی ہالز کیلئے ضابطہ کار (ایس او پیز) جاری کردیے۔

گزشتہ دنوں این سی او سی نے شادی ہالز میں تقریبات کے باعث کورونا پھیلنے پر تشویش کا اظہار کیا تھا جس کے بعد اب کورونا کی روک تھام کیلئے ضابطہ کار جاری کیے گئے ہیں۔

این سی او سی کے مطابق کورونا وائرس سے بچاؤ کیلئے حفاظتی اقدامات پر عملدرآمد ضروری ہے، شادی ہالز میں ہر تقریب کا دورانیہ 2 گھنٹے ہوگا اور رات 10 بجے کے بعد تقریب کی اجازت نہیں ہوگی۔

اس کےعلاوہ اِن ڈور اجتماعات میں 300 جب کہ آؤٹ ڈور میں 500 افراد کی شرکت کی اجازت ہوگی اور ضابطہ کار کی خلاف ورزی پر متعلقہ شادی ہال کو بند کردیا جائے گا۔

نیشنل کمانڈ اینڈ آپریشن سنٹر نے شادی ہالوں کو احکامات جاری کرتے ہوئے کہا شادی ہال میں ہونے والی تمام تقریبات میں کورونا وائرس احتیاطی ایس او پیز کو سختی سے نافذ کرنا ہو گا۔

کمانڈ سنٹر کی جانب سے جاری کی جانے والی ہدایات درج ذیل ہیں :

1) صرف قریبی افراد اور رشتہ داروں کو شادی میں شامل ہونے کی اجازت ہوگی۔

2) ہاتھ ملانا اور گلے ملنا سختی سے منع ہو گا

3)ہالوں کے اندر ہر شخص چہرے پر لازمی ماسک پہنے گا۔

4)بیمار لوگوں کو شادی ہالوں کے اندر اجازت نہیں ہوگی۔

5)ہالوں کی صفائی باقاعدگی سے کی جائےگی۔

6)سماجی فاصلے کو برقرار رکھتے ہوئے ایک کنبے کو ایک میز پر بیٹھنے کی اجازت ہوگی۔

7)میزیں ایک میٹر کے فاصلے پر رکھی جائیں گی اور کھانا ٹیبل پر پیش کیا جائے گا یا بوفے نظام لگایا جائے گا۔

8ہال میں داخل ہونے سے پہلے تمام لوگوں کو تھرمل گن کے ساتھ بخار کا معائنہ کیا جائے گا۔

ملک میں کورونا سے آج مزید 8 افراد انتقال کرگئے ہیں جبکہ مزید 661 افراد میں کورونا کی تصدیق ہوئی ہے۔

خیال رہے کہ ملک میں کورونا کیسز میں کمی کے بعد ستمبر سے شادی ہالز کھولے گئے تھے تاہم ضابطہ کار کی خلاف ورزی پر کراچی سمیت دیگر شہروں میں کئی ہالز کو بند کردیا گیا ہے۔

 

متعلقہ خبریں

Leave a Comment